అత్తను పెళ్లి చేసుకున్న అల్లుడు... వీడియో వైరల్!

సమాజంలో బంధాలు, బంధుత్వాలకు ఉన్న నైతిక విలువలను ప్రశ్నించేలా ఉత్తర ప్రదేశ్‌లో ఒక విచిత్ర ఘటన చోటుచేసుకుంది. ఒక వ్యక్తి తన అత్తను న్యాయస్థానంలో వివాహం చేసుకోవడం ప్రస్తుతం తీవ్ర చర్చనీయాంశంగా మారింది. దీనికి సంబంధించిన వీడియో సామాజిక మాధ్యమాల్లో వైరల్ కావడంతో ఈ ఉదంతం వెలుగులోకి వచ్చింది.

కాన్పూర్ దేహత్ జిల్లాలోని అక్బర్‌పూర్ ప్రాంతంలో ఈ సంఘటన చోటుచేసుకుంది. ఒక వ్యక్తి తన అత్తతో పూలదండలు మార్చుకుని, కోర్టు ఇచ్చిన వివాహ పత్రాన్ని చూపిస్తున్న వీడియో ప్రస్తుతం నెట్టింట వైరల్‌గా మారింది. తాము ఇష్టపూర్వకంగానే ఈ నిర్ణయం తీసుకున్నామని, అందరూ తమను అర్థం చేసుకుని ఆశీర్వదించాలని వారు ఆ వీడియోలో అభ్యర్థించారు.

మీడియా కథనాల ప్రకారం, వీరిద్దరి మధ్య గత నాలుగేళ్లుగా రహస్య సంబంధం కొనసాగుతోంది. సదరు వ్యక్తికి గతంలోనే ఈ మహిళ కుమార్తెతో వివాహం జరిగింది. అయితే, కొంతకాలం క్రితం అత్తాఅల్లుడు ఇంటి నుంచి పారిపోయి, ఇప్పుడు న్యాయస్థానం సాక్షిగా ఒక్కటయ్యారు.